wait...wut?!...one nodda bugga??!!!!!

everyone stay asking why i wen move ova to da kine fransancisco (as one keiki wen call it one time) and g wen suggest dat i blog it so dis is wut it is.

i stay tinking it was seven yeas befoa wen i wen visit my modda like i did every yea. i wen tink to myself, ho brah, i like move to da kine fransancisco too brah. it's so fool of fun over hea l'dhat and i goin' be closa to my modda. i was tinking it's one gooood idea for me if i move over hea. get lots for do and so many places for shop. ho brah, i goin' do it...i goin' move. so if my tinking stay correct l'daht, seven yeas laytah, hea i stay...in fransancisco boo. yea, seven yeas laytahs. but dat no madda cuz i stay hea now. i wen move up in august, on da second. ho cuz! i still cannot beleev daht i stay hea! man! over hea stay so cold in august...wat wen happen to da kine summer time l'daht??

i wanted for move earliah but dea wuz da kine "VAA-RHEE-US" reasons why i needed fo stay back. anyway, i wen pray about 'um and da picture in my head wen finally come clea couple months ago. dea stay tings i said i would move afta i finish and i wen bring 'um to completion and dea stay odda tings dat stay no moa in my capabilities to handle and i wen need fo give 'um to god already and get on wit my life. and plus too i was missing my modda and sista (who wen move up hea in twotaosenandtree) so much. and i wanted fo go back school to get da kine more edumacation l'daht fo' get smatta in da brain and stuff. and den i needed change cuz i was getting so lazy in hawaii l'daht. so dat's why i wen move up hea. actu-a-lee, dea's more reasons but doz stay da main ones.

but so funny, i gotta share about one experience i had...befoa i wen fly to fransancisco, i wen visit my friends j&b in da kine hilo for grind wit 'um and it was $70 cheapa for fly to fransancisco from hilo den from honolulu boo! no kidding brah! dat's for real cuz!! same airlines too and den! but the odda funny ting is my flight for hilo to fransancisco wuz supposed to have only one layover in honolulu, but dea was one nodda layover afta dat in kona! so i wen from hilo to honolulu to kona to fransancisco!! crazyness brah!! but tanks to my goodest friend a, who wen give me one awesome book to read while i stay flying, called "the big bento box of unuseless japanese inventions"...yeah, "unuseless"...inventions in japan dat stay useful but not really cuz...like one men's tie dats one umbrella or one umbrella wit one bike ringa at da handle or one headband wit hooks on boths sides fo hook one laydees purse and keep da kine hands free brah...so funny boo!! only her would get me one book l'daht! i wuz laughing so much! tanks a!

anywayz, i miss my frenz and ohana in hawaii nei and da warm weadda...but fo now, deas ting fo see, good grinds fo try, money fo make so i can go places fo shop and odda places fo experience, one edumacation fo get and da kine peopo fo meet.

laytahs boo! -honeygirl